حوار بين البحر والشاعر بلكديش :
الحمد لله مولانا على كل حال
يعطي ويمنع وهو باقي ولاله زوال
وصلاة ربي على المختار بدر البدور
يالله عسى الخاتمه زينه تقع في سرور
اثنين من شهر نوفمبر والفين عام
زيّد خمستعشر بالوفاء والتمام
من يوم ميلاد عيسى ثابته في الشهور
يالله عسى الخاتمه زينه تقع في سرور
ايش الخبر والحكايه ياخياص البلاد
عاشوف بحر العرب موجه على الحدّ زاد
يوم الثنين المطر والريح سبر يثور
يالله عسى................
والبارح الناس كلٍ من مكانه شريد
حد حلّ في قرب يترقّب وآخر بعيد
ما حد بقى الاّ الغنم وشباب مثل الصقور
يالله عسى..............
جواب الخياص
ياسعيد بحر العرب صابر عليكم سنين
يعطيكم الخير والصيد الطري والسمين
واليوم زعلان من باطل وقع به وجور
يالله عسى.............
اوّل خطيّه بنيتوا في حدوده بيوت
واحد يعارض ويسكت والبقيّه سكوت
كل ما نوى عالزياره مالحق له عبور
يالله عسى........
الثانيه الشاطئ الذهبي قمامه كوام
فوق البلاليع والترخيص حسب النظام
من بعد ما كان صافي زين ويشعّ نور
يالله عسى
والثالثه الشرتوان الظالم المفتري
وكذا السخاوي ولا واحد بظني بري
ضرّيتوا البحر وعدمتوا الصرع والحدور
يالله عسى...........
والرابعه ساريين الليل لقّوا كلام
والصرف دولار وانتم في المساكن نيام
تحت الحراسه عصابات البصل والتمور
يالله عسى.............
والخامسه شبكة الديزل وراهم هنه
ماشي لهم حسّ في الخيصه كما ذه السنه
وتنزّل الصيد والبرميل فوقك يدور
يالله عسى......
النفط قد له مواني دوب تستقبله
ماحد يجيب البوز للسّيف وتحمّله
والعالم الله بمن يستقبله في البرور
يالله عسى
هذا خطاكم وذا ردّي لأهل الخطا
والحق لابدّ منّه ان سرع وان بطى
وانتم عسى تفهموني ماتظلّون صور
يالله عسى الخاتمه.......
واحد وسبعين شليتوا حقوق البشر
وانذرتكم بالرياح العاتيه والمطر
والموج،انذار ناصح مادخله الغرور
يالله عسى...........
وجهت خطابي للبحر وقلت له
يابحر كلّه كلامك والحكى في الصميم
واعرف رطينك لأني في جوارك مقيم
وانت معك علم في مرجعي هو والدفور
ياللله عسى......
لكن غشمان هذا الوقت ماهم تمام
مهدّمين القيم ومخالفين النظام
اللي بنوه الشيابه من قديم العصور
يالله عسى........
وصحيح لقّوا ولقّوا بس نا ما لقيت
وكثير مثلي يعلّوا الصوت في كلّ بيت
لكن ماحد سمع ناصح ولاشل شور
يالله عسى الخاتمه زينه تقع في سرور
واليوم باعاهدك عهد الوفاء في كتاب
والله يغفر لمن ترّك ذنوبه وتاب
خاف العويله يطيعونا في بعض الامور
يالله عسى.........
وان كان ماحد تراجع منّهم في الغلط
نا باعمد في الطرف مابادخل في الوسط
وانت معك حقّ لو ودّيتهم للقبور
يالله عسى..............
ماحد يشوف الزلل ويقول ماهو زلل
الاّ الذي مخلف النيّه خبيث العمل
عادك عطينا مهل حتى نقول للزقور
يالله عسى.............
جواب البحر
ناباعطيكم مهيله صلّحوا مافسد
وتشاوروا بينكم ياساكنين البلد
والدّ لابدّ تلقوا حدّ لأهل الشرور
يالله عسى.......
بدو الجبل يشتكوا ماحصّلوا شي وزيف
من بعد ما غرّموا بالعيد اهل الجريف
وين الطلع والنهاب السود ماتشوف كور
يالله عسى..........
هذا الطمع ساقكم وسعى بكم للخراب
عميان ماتميّزوا بين الخطاء والصواب
دمّرتوا الرزق وحمتوا الشر والطيور
يالله عسى.....
والسيسبانه يزوروها صحاب الحبوب
والقات والشغل لي يخلّي في راسك هبوب
وانتم تشوفون والاّ ماتشوفون عور
يالله عسى
وانت خبرهم بهذا لاتخالف بشي
وان باتقع مثلهم ظالم وباترتشي
ياكمّ زيّك على البيسه يشهدون زور
يالله عسى............
والوعد بيني وبينك عندما نلتقي
هذا كلامي وهت لي ردّ واضح نقي
ياخير وصلاح ياصرخه على كل سور
يالله عسى.........
بعد هذا الحوار مع البحر وجّهت خطابي الى اهل البلاد وقلت
هذا الذي خطّ في المحضر نهار الثلوث
والسفو،بعده على الشاطئ قمامه وروث
ماتشلّ حزمه تخلّي طست واحد يفور
يالله عسى.......
والبحر ثابت مكانه واحتكم والتزم
وانتم عساكم تقولوا كل ما صار تمّ
وتنفذوا كلّ ما جا وانكتب في الوثور
يالله عسى...........
وان باتظلّوا على عاداتكم ساكتين
في كلّ مافيه صلاح الشان متهاونين
لاتلوموا البحر لو هدّم ميات القصور يالله عسى........
ذا بحر والبحر طاهر قط ماهونجس
لاتلوّثوه بالنجاسه عاد معكم نفس
منّه غذانا ومنّه غسلنا والطهور يالله عسى.......
هذا كلامي لكم وانتم عرب فسّروه
والوقت عاده مدي لو كان باتدرسوه
وان باتخلّوه هبا عاد الواير تدور
يالله عسى...والختم صلّوا على المختار خير البشر
من بعد هذا عساكم ماتشوفون شر
وتحسّنون النيه وتصححون الصدور
يالله عسى الخاتمه زينه تقع في سرور
هذا حديث دار بيني وبين البحر حبيت تسمعوه وتعطوني رايكم،
العنوان، بيني وبين البحر.
الأربعاء نوفمبر 18, 2015 1:59 am
